July 18, 2011

- bombay mayday -

Minggu lopeh opis kitorang ado buek latihan kebakaran atau dalam bahaso kampung den "fire drill". Punyo lah menantikan puko 12 nak tibo, dah tibo loceng eh lambek pulak berbunyi. So (oops, so bukan loghat nogoghi yo), bilo loceng berbunyi, reramai la yang turun. Rilek yo la kan sobab praktis yo. Cubo boto2 terbaka, mesti ado yang menolak2 punyo. Apo punyo orang la ni.

Lopeh acara tughun beramai2 tu kitorang lepak kek bawak pokok. Punyo lah meriah, ntah sapo2 den nampak ari tu. Banyak lak muko yang den tak kona. Tapi santai yo sumo eh, lepak2 amik gambar laie. Tak cayo?? Ado bukti eh a, den bukan PRDM yo. Huhuhu...


Osah ceghio yo masing2, macam duduk topi pantai yo ghoman eh. Time ni macam2 la mengumpek den donga. Sompek yo tu kan.

Yang pakai jaket macam bapok polisi tu En. Mizi, ketuo keselamatan kitorang. Kiro kalau den mati terbakar, den keluar kubo cari dio la dulu nak baleh dondam. Kigho berjayo jugak la dio ni, cumo kesian lak kono maghah dongan oghang bombay. 

Ini antagho bukti oghang yang selamat, kalau tak selamat takdo lepak2 macam ni kompom dah ghontong. Lamo gak la duduk bawah tu, den ingatkan takdo apo2 sekali lalu lak keto bombay siap bunyi siren laie. Dari jauh nampak macam Trannsformers (baru yo lopeh marathon transformer maso tu). 
Gamba ni den amik kek Mekchu, den tak sompek nak snap. Mencicit laju keto ni, kigho BumbleVy den takleh monang la lawan dio. Mungkin ado hikmah eh den tak sompek tu. Nak tau apo hikmah eh? Check it out!!

Jeng

Jeng 

Jeng

Ni kosan eh, kemain bergayo den dongan keto bombay nih. Dah raso macam mamat Indon nak buek salam perantauan pulak pose macam ni. Retro sungguh raso eh.

Mulo2 nak amik gambar kek topi ni yo. Sekali abang bombay tu suh den naik pulak, siap bukakkan pintu laie. Den naik nampak lak ado topi, den pun pakai la. Den pun mulo la nyanyi lagu Ultraman Ace, Hakuto, Minami, Hakutoto Minami. Huhuhu
 Posing maut sobolom kono langgar
Satu posing yo den tak sanggup nak buek. Sobab eh, usahkan tengok buek pose ni pun buleh buek den muntah. Pose eh macam mamat bangla ni buek ha....

Amacam?? Dah ado ghaso mual2, loyo2 tokak kan?? Takpo biaso la tu...

Moral eh yo kawan2, kalau ado latihan kebakaran macam ni kek tompek koghang, silolah bagi korjosamo. Mano la tau, kalau boto2 terbaka sompek yo korang selamat. Amik2 gambar ni kigho sampingan yo, dah ko goma posing layankan yo la. Tapi kalau bangunan terbaka nampak asap eh, hati terbaka sapo la yang tau.

3 comments:

  1. bughok bona ekau cakap noghori jang oii.. goli den.. when u speak in malay, u looked stupid.. hahahaa...

    ReplyDelete
  2. This comment has been removed by the author.

    ReplyDelete
  3. kalau aku ada, mesti aku yang kena pakai baju mizi tu kekekekekeke

    ReplyDelete